Gwamnan Bauchi Bala Mohammed ya dakatar da komawa APC biyo bayan rikicin rabon iko da jam’iyyar

Shirin sauya sheƙar Gwamnan Jihar Bauchi, Bala Mohammed, daga jam’iyyar Peoples Democratic Party (PDP) zuwa All Progressives Congress (APC) ya tsaya cik sakamakon saɓani kan rabon iko.

Tattaunawar tsakanin ɓangaren PDP da ke ƙarƙashin jagorancin Turaki da shugabannin APC ta rushe bayan jam’iyyar mai mulki ta ƙi amincewa da tsarin rabon kashi 60 da 40.

Shugaban ɓangaren PDP a Bauchi, Sama’ila Burga, ne ya bayyana hakan ga manema labarai a ranar Asabar.

Ya ce APC ce ta fara tattaunawar tare da haɗa shugabanninta na ƙasa da kuma Gwamnan Kano, Abba Yusuf, domin shawo kan Mohammed ya shiga jam’iyyar.

Sai dai ya ce tattaunawar ta tsaya ne bayan APC ta ƙi tsarin rabon iko da aka saba amfani da shi a irin wannan yanayi.

Burga ya ce, “Ba za a iya tsammanin gwamnati da ta kawo tsarinta daga matakin mazaɓa zuwa jiha ba ta samu rinjaye a jam’iyya.”

Ya ƙara da cewa an gudanar da wannan taron manema labarai ne bisa umarnin gwamnan da ke jagorantar tattaunawar.

A cewarsa, bayan tuntuɓar masu ruwa da tsaki, sun yanke shawarar dakatar da tattaunawar gaba ɗaya.

Ya ce, “Ba a amince da sharuɗɗan da muka gabatar ba, don haka tattaunawar ba ta kai ga matsaya ba kuma an dakatar da ita.”

Burga ya ce yanzu suna nazarin wasu hanyoyin siyasa daban domin sanin wacce za ta fi dacewa da muradun al’ummar Bauchi.