Fashewar Motar CNG Ta Tayar da Hankalin Jama’a a Kaduna, Duk da Rashin Samun Asarar Rai

Wata motar bas mai amfani da iskar CNG ta yi kaca-kaca bayan wata fashewar ba zato a tashar Mando da ke Jihar Kaduna.

A cewar rahoton Punch, lamarin ya faru ne ba tare da ganin wata alama ba, inda ya bar motar cikin mummunar lalacewa tare da tarwatsa wasu abubuwa a yankin.

Shaidun gani da ido sun ce ƙarar fashewar ta ja hankalin matafiya da ƴan kasuwa, lamarin da ya sa jami’an agaji suka gaggauta kai ɗauki.

Duk da girman ɓarnar, babu wanda ya rasa ransa, abin da mutane da dama suka bayyana a matsayin abin al’ajabi.

Har yanzu hukumomi ba su tabbatar da dalilin fashewar ba, amma ana zargin akwai a matsalolin tsaro a motocin CNG.

Ana sa ran hukumomin da abin ya shafa za su fara bincike mai zurfi kan yadda ake kula da waɗannan motocin da kuma tsarin tsaron lafiyarsu.

Masana sun ce lamarin na iya jawo ƙarin buƙatar duba kan amfani da fasahar CNG a harkar sufuri a Najeriya.

Hakan na zuwa ne yayin da ake ƙoƙarin inganta hanyoyin makamashi masu rahusa a ƙasar.