Rundunar Nigeria Security and Civil Defence Corps (NSCDC) reshen Jihar Lagos ta gano wani gidan sayar da jarirai ba bisa ƙa’ida ba a yankin Okuju da ke Ilado, Badagry, a ranar Alhamis 17 ga Afrilu 2026.
Kwamandan rundunar a jihar, Adedotun Keshinro, ya bayyana hakan ranar Juma’a yayin da aka gabatar da waɗanda aka ceto a ofishin NSCDC da ke Ibereko.
Ya ce jami’an sun ceto mata 18 masu juna biyu da yara 10, tare da kama waɗanda ake zargi Joy Okeke da Raphael Agwu.
Keshinro ya ce an kai samamen ne bayan binciken sirri na makonni uku, inda aka gano cewa ana sayar da jarirai ga masu siya bayan haihuwa.
Ya ce ana yaudarar matan ne ta hanyar tallace-tallace a Facebook, inda ake yi musu alƙawarin kuɗi daga ₦500,000 zuwa ₦1.8 miliyan bayan sun haifi jarirai.
A cewarsa, “wannan laifi ne mai tsanani ga bil’adama,” yana mai cewa za a miƙa waɗanda ake zargi ga ƴan sanda domin gurfanar da su.
Ya ƙara da cewa, za a miƙa waɗanda aka ceto ga National Agency for the Prohibition of Trafficking in Persons domin kula da su.
Ɗaya daga cikin waɗanda ake zargi, Joy Okeke, ta ce aikinta shi ne taimakawa masu neman haihuwa wajen samun yara, amma ta ƙi bayyana cikakken bayani.
Wasu daga cikin matan sun ce sun amince da yarjejeniyar bayar da jariransu ne bayan haihuwa domin samun kuɗi.
Waɗanda aka ceto sun ce ana kula da su da abinci da lafiya, amma ba su da ƴancin fita yadda suke so.
NSCDC ta ce za ta miƙa wurin ga gwamnatin jihar, wadda za ta iya rusa shi domin hana ci gaba da irin wannan aiki.
