Amurka Ta Gargaɗi Ƴan Ƙasarta Kan Zuwa Najeriya Saboda Tsanantar Matsalar Tsaro

Gwamnatin Amurka ta gargaɗi ƴan ƙasarta da su guji tafiya Najeriya tare da umartar ma’aikatanta masu sauƙin aiki su fice daga ƙasar, watanni biyar bayan ayyana Najeriya a matsayin “Country of Particular Concern.”

A wata sanarwa da Ma’aikatar Harkokin Wajen Amurka ta fitar a shafinta na X, ta danganta matakin da ƙaruwar matsalar tsaro a wasu sassan Najeriya.

Rahoton Premium Times ya nuna cewa Najeriya na fuskantar ƙalubalen tsaro daga ƙungiyoyin ƴan bindiga da ƴan ta’adda a jihohi da dama, ciki har da Katsina, Borno da Benue.

Duk da haka, Amurka ta sha fuskantar suka kan yadda take danganta rikice-rikicen da batun tsangwamar addini.

A cikin sabon gargaɗin, Amurka ta bayyana Najeriya a matsayin ƙasa mai haɗari, tana mai lissafa laifuka kamar fashi da makami, garkuwa da mutane da hare-haren ƴan bindiga a matsayin ruwan dare.

Ta kuma ce, “An ba ma’aikatan gwamnati da iyalansu izinin barin ofishin jakadancin Amurka da ke Abuja sakamakon taɓarɓarewar tsaro.”

Sanarwar ta kuma buƙaci ƴan Amurka da su sake tunani kafin tafiya Najeriya, tana mai jaddada cewa wasu jihohi kamar Borno, Kaduna, Rivers da Zamfara na cikin yankunan da ke da matuƙar haɗari.

Ta ƙara da cewa, “Kar a yi tafiya zuwa waɗannan wurare saboda rashin tabbas na tsaro.”

Wani ɓangare mai tayar da ƙura shi ne gargaɗin da Amurka ta yi kan tsarin lafiya a Najeriya, inda ta ce asibitoci ba su kai kusa da matsayin na Turai ko Amurka ba.

Duk da haka, masana sun ce duk da ƙalubale, an samu ci gaba a ɓangaren lafiya a Najeriya a ƴan shekarun nan.

Har zuwa lokacin haɗa wannan rahoto, gwamnatin Najeriya ba ta mayar da martani kan wannan gargaɗi ba.